Weihnachten fröher


Fröher han ich Weihnachte schön jefunge,
do wor och dat Feß noch met Schnee verbunge.
De Zick wor zwor ärm, un et jov och nit vill,
jet Sößes om Teller, e paar Strümp un e Spill.

Doch dat beßje, wat do wor, wot met dem Hätze jeschenk,
do wot nix ümjetuusch, och wor keiner jekränk.
Hück hät jederein vil mih, doch dat mät nit zofredde,
fröher heelt mer zosamme – hück es mer zerstredde.

Op dr Desch kumme nur finge Tillekatesse,
doch mer hät üvver all dem de Hätze verjesse.
Dr Ömsatz weed jrößer, et Jeföhl klitzeklein.
Heisch et nit bei dem Feß: ".... kehrt der Frieden doch ein?"

Et litt nit am Schnee, et litt nit an de Lück,
dat Weihnachten fröher schöner als hück.
Loßt dat Hätz widder spreche, schalt dr Fernseher uus,
reist nit noh Mallorca, feet dat Feß still zu Huus.